၎။ ကိုရင်ဘ၀ ရွှင်လှသော ကဗျာ

ကိုရင်ဘ၀ ရွှင်လှသော ကဗျာ

ဗန်းမော်ဆရာတော်သည် သာမဏေဘ၀ကပင် ကဗျာစာစပ်ရာ၌ တော်လှသည်။ ရှင်ပဏ္ဍိတသည် သာမဏေ ဘ၀မှ ခေတ္တလူထွက်၍ ရွှေတောင်မြို့ရှိအိမ်သို့ ပြန်လာရာ ငယ်သူငယ်ချင်းများနှင့် ရွာထဲသို့ လည်ပတ်ကြသည်။ ရွာလယ်တွင် ကြီးမားလှသော ညောင်ပင်ကြီးတပင်ရှိသည်။ ရွာထဲမှလူငယ်လူရွယ်တို့သည် အရိပ်ကောင်းလှသော ညောင်ပင်ကြီးအောက်တွင် စုရုံးကာ ကစားခြင်း၊ အေးဆေးစွာထိုင်၍ စကားပြောခြင်းတို့ကို ပြုလုပ်ကြသည်။

ကိုရင်လူထွက်ပဏ္ဍိတသည် သူပိုးပန်းနေသော မမင်းမှိန်နှင့် အပျိုဖော်တစု ညောင်ပင်အောက်တွင် ရှိနေသဖြင့် ရစ်သီရစ်သီလုပ်နေသည်။ မမင်းမှိန်ကိုသာ ဂရုတစိုက်နှင့် မလှမ်းမကမ်းမှာ စကားပြောနေသည်။ ဤသို့ စကားပြောနေစဉ် မမင်းမှိန်သည် အန္တရယ်မအောင့်နိုင်ပဲ ''လေလည်'' လိုက်သည်ကို ကြားလိုက်ရသဖြင့် ကဗျာဥာဏ် ၀ါသနာကြီးလှသော ကိုရင်လူထွက်မှာလည်း မအောင့်နိုင်တော့ပဲ စာချိုးတပုဒ်ကို ရုတ်တရက်စပ်လိုက်သည်။

ရွှေညောင်ပင် သာသည့်ကုန်း၊
စုရုံး၍နေကြရာ၊
မမင်းမှိန် အပျိုကြီးရယ်၊
အီးညှစ်လို့ပါ။

ဟူ၍စာချိုးလိုက်ရာ ကာလသားများ ''၀ါးကနဲ'' ပွဲကျ၍ ရယ်မောလိုက်ကြသည်။ ထိုကာလသားများတွင် မမင်းမှိန်၏မောင်တော်သူငစွန်က သူ့အစ်မလေလည်သည်ကို လူပုံအလယ်တွင် အရှက်ကွဲအောင် စာချိုးရမလားဟု ဒေါသမာန်ပွားကာ ကိုရင်လူထွက် ပဏ္ဍိတကို ဆဲဆိုလေသည်။ ထိုအခါ ကိုရင်လူထွက် ပဏ္ဍိတသည် ရုတ်ချည်းကောက်၍ စာချိုးလိုက်ပြန်သည်မှာ

မလိမ္မာ ဗာလနာ မိုက်ခဲ။
သူ့အစ်မ စအိုတွန်လို့၊
မောင်ငစွန် မျက်မာန်ရှတယ်၊
ဒေါသနဲ့ဆဲ။

***********************