အစက ပဏ္ဍိတလို ကျက်ခဲ့ပါလား
နယုန်လရောက်၍ စာပြန်ပွဲတော်ကျင်းပမည့်ရက်တွင် မန္တလေးတောင်ခြေရှိ သုဓမ္မာဇရပ်တွင် စာဖြေ သံဃာတော်များအတွက် ဆွမ်းကွမ်းကိစ္စ စီမံကြသလိုပင် စာဖြေမည့် သံဃာများသည်လည်း နီးရာသစ်ပင်ရိပ်များ၌ ပုရပိုက် ပေစာထုတ်များကို ပြန်လည်ကြည့်ရှူကာ မေးမည်ထင်သမျှကို ပြန်လည် ကျက်မှတ်ခြင်းများလည်း ပြုလုပ်နေကြလေသည်။
စာစစ် သံဃာတော် ဆရာတော်များသည်လည်း စစ်မေးရန် ရှိသမျှ စာပြန်ပွဲဝင် ပုဂ္ဂိုလ်များကို မဟာဒဏ်ဝန်၏ ပင့်ဘိတ်ချက်အရ တပါးပြီးတပါး စစ်မေး၍ နေကြလေသည်။ ရှင်ပဏ္ဍိတ အလှည့်သို့ ရောက်လေလျှင် မဟာဒဏ်ဝန်က...
''မြင်းဝန်တိုက်မှ ရှင်ပဏ္ဍိတ ကြွပါဘုရား'' ဟု အသံကျယ်လောင်စွာဖြင့်ဟစ်၍ လျှောက်ထားလေသည်။ အသားမဲမဲ၀၀တုတ်တုတ် ကိုရင်ပဏ္ဍိတသည် ပရိတ်သတ် ဗိုလ်ပုံအလယ်တွင် ရဲဝံ့စွာ လျှောက်၍သွားသည်။ စာမေးပွဲစစ်သည့် ဆရာတော်များက ဖြေဆိုရမည့်အခန်းကို ညွှန်ပြ၍ ရွတ်ဆို ဖြေကြားရန် မိန့်တော်မူသည့်အခါ ကိုရင်ပဏ္ဍိတသည် မြင်းကောင်း ပြေးသကဲ့သို့ မနားတန်းရွတ်ဆို၍သွားလေသည်။ အသံသြဇာမှာလည်း အံ့သြလောက်အောင် နက်ကျယ်ကောင်းမွန်လှသဖြင့် မဟာဒဏ်ဝန်နှင့်တကွ ဆရာတော် သံဃာတော်များစာဖြေပုဂ္ဂိုလ်တို့မှစ၍ သုဓမ္မာဇရပ်တွင်ရှိသမျှ ပရိတ်သတ်အပေါင်းတို့မှာ ကိုရင်ပဏ္ဍိတ အပေါ်တွင် အာရုံဝင်စား၍ ဆိတ်ငြိမ်စွာ နားထောင်နေကြတော့သည်။
မြင်းကောင်းပြေးသကဲ့သို့မေးသမျှတို့ကို ပုဒ်ပါဋ္ဌ်ပီပြင်ကျနစွာရွတ်ဆိုသည့်ကြားမှ လျှင်မြန်လွန်းအားကြီးသဖြင့် ပုရပိုက်ကိုလိုက်၍ဖတ်သော စာစစ်ဆရာတော် များသည် ကိုရင်ပဏ္ဍိတ၏ရွတ်သံကို မှီအောင်မဖတ်နိုင်ပဲ ပုရပိုက်တချပ်လှန်တိုင်း ကျန်ခဲ့သဖြင့်...
''ဟဲ့... ကိုရင် ရပ်အုံး''ဟု အမိန့်ရှိသည့်တိုင်အောင် မရပ်မနားဆက်၍ရွတ်နေရာ စာစစ်ဆရာတော်တို့က ''ရပ်အုံးဆိုတာ မကြားရော့သလား'' ဟု ငေါက်ငန်းလေသဖြင့် ကိုရင်ပဏ္ဍိတသည် စာကိုရွတ်နေရာက ရပ်တန့်၍...
''ဘာခုမှရပ်အုံးလဲ အစကပဏ္ဍိတလို ကျက်လာခဲ့ပါလား'' ဟု စာစစ်ဆရာတော်တို့ကိုပင် ပြန်လည် ငေါက်ငန်းလေသည်။ ပရိသတ်တို့မှာ ''၀ါး''ကနဲပွဲကျသလောက် ကိုရင်ပဏ္ဍိတသည်လည်း ထင်ရှား၍သွားသည်။ မြင်းဝန်မင်းကိုရင်ဖြစ်၍လည်း မြင်းဝန်မင်းမှာ အများ၏ အာရုံစိုက်ခြင်းခံရသဖြင့် ကိုရင်ပဏ္ဍိတအား များစွာ ကျေနပ်နှစ်သိမ့်လေသည်။
*******************
No comments:
Post a Comment