Wednesday, January 27, 2010

ဦးဇာဂနာသို့ မွေးနေ့ဆုမွန်

ဦးဇာဂနာသို့ မွေးနေ့ဆုမွန်

၂၇-၀၁-၂၀၁၀



သူ့ကိုစသိကာစကတော့ ခပ်ရေးရေးပဲ။ အသံတုတွေ လုပ်တာတော့ မှတ်မိတယ်။ သူက ဖေဖေ လေးစားရတဲ့ ဖေဖေ့ မိတ်ဆွေ ဘဘဦးနန်းညွန့်ဆွေရဲ့ သားတဲ့။ ကိုယ်တို့မြို့နယ်ကပြုလုပ်တဲ့ စာပေဟောပြောပွဲမှာ ဘဘက စာပေဟောပြောတယ်။ အဲဒီတုန်းက ခပ်ငယ်ငယ် ကိုသူရက အသံတုလုပ်ပြီး ပရိတ်သတ်တွေကို ဖျော်ဖြေတယ်။ အဲဒီကတဲက ကိုသူရငယ်ငယ်ကို အရမ်းသဘောကျတယ်။ နောက်တော့ လေးစားလာရတယ်။


၁၉၈၀ကျော်ပတ်ဝန်းကျင် သင်္ကြန်တွေမှာ တက္ကသိုလ်ပေါင်းစုံအနုပညာအသင်း၊ မြို့တော်ခန်းမ ဖျော်ဖြေပွဲတွေကနေ သူ့ကို အပြင်မှာ ပြန်မြင်ရတယ်။ သူ့မျက်နှာက အပြင်မှာဆို ခပ်တည်တည်လိုနဲ့ ပြက်လုံးပြက်တော့မယ်ဆိုမှ မျက်နှာထားက ရီရတော့တာ။ သူ့ပြက်လုံးတွေက ပညာပါတော့ ငယ်တုန်းက အဓိပ္ပါယ်ကိုသေချာနားမလည်။ တဖြည်းဖြည်းနဲ့မှ သူ့ကို တအားသဘောကျခဲ့ရတယ်။

သူ့ရဲ့ ရိသဲ့သဲ့လေသံကြီးနဲ့ပြောတတ်တဲ့ နေကောင်းသွားမှာပါ၊ အားလည်းနာတယ်၊ ခင်လည်းခင်တယ်၊ သနားတယ်၊ သိနေတယ်လေ၊ သိနေတယ် စတဲ့ စကားလုံးတွေက ရပ်ကွက်ထဲမှာရော ကျောင်းက သူငယ်ချင်းတွေကြားမှာ အလွန်ရေပန်းစားခဲ့တာပေါ့။

အဲဒီနောက် သူ့ရဲ့ ပြောင်မြောက်တဲ့ ဟာသတွေကြောင့် ခဏခဏ ခေါ်ယူစစ်ဆေးခံရတယ်လို့ ကြားတယ်။ ဒီနိုင်ငံမှာ နေပြည်တော်လည်း မကောင်းဘူး။ သမတလည်းမကောင်းဘူး၊ ပပ၀င်းပဲ ကောင်းတယ်ဆိုတဲ့ မထိတထိ ပြက်လုံး၊ ဟိုကောင်စီလည်း မကောင်းဘူး၊ ဒီကောင်စီလည်း မကောင်းဘူး။ မင်းတို့ အုတ်စီနေတာ တယ်ခက်တာပဲ ဆိုတဲ့ ခပ်တည်တည်လေသံ၊ လွှတ်တော် အစည်းအဝေးတွေ ကျင်းပနေချိန် ကောင်မလေးကို ဖက်ထားပြီး ကောင်မလေးက လွှတ်တော်၊ လွှတ်တော် မကောင်းဘူးဆိုတဲ့ ရိသဲ့သဲ့ ထေ့လုံး၊ ဂျိုကုတ်ဒူးကြီးကျောပြောင်ဆိုတဲ့ ကြံကြံဖန်ဖန် လှောင်ပြောင်ဟန်၊ သူက ဘာကိုမဆို ဟာသဉာဏ်နဲ့ အကုန်ကြည့်တတ်တဲ့သူကိုး။ ဒီလို ဟာသတွေလုပ်လို့ သူ့ကိုဖမ်းမှာကိုလည်း သူက ကြောက်ရွံ့နေတတ်တဲ့သူမဟုတ်ပါဘူး။

၂၀၀၇ စက်တင်ဘာ ၂၆ရက်နေ့က နောက်ဆုံး အဖမ်းခံရတဲ့အချိန် အင်တာနက်နဲ့အစိုးရကို အကြည်ညိုပျက်အောင် လုပ်တယ်ဆိုတဲ့ အီလက်ထရောနစ် အက်ဥပဒေ၊ နိုင်ငံတော် လုံခြုံရေးကို ထိခိုက်တဲ့ လှုံ့ဆော်မှုနဲ့ ဗီဒီယိုအက်ဥပဒေ စတာတွေနဲ့ စွတ်စွဲခံရပြီး ထောင်ဒဏ် ၅၉နှစ် စီရင်ချက်ချခံရတာတောင်မှ သူက ဘယ်သူ့ကိုမှ မကြောက်မရွံ့ သတ္တိရှိရှိ ဟာသညာဏ်ပါပါနဲ့ ကမ္ဘာမှာ စီးပွားရေးတွေ ဆက်တိုက်လို ကျဆင်းနေပေမဲ့ မြန်မာနိုင်ငံက တက်နေတယ်ဗျို့၊ ထောင်ဒဏ်တွေလို့ ခပ်ထေ့ထေ့လေး သရော်ခဲ့ပါသေးတယ်။

မြန်မာတို့ရဲ့ အချစ်တော် လူရွှင်တော်ဇာဂနာရဲ့ ၂၇ရက် ဇန်န၀ါရီလ ၂၀၁၀ခုနှစ်မှာ ကျရောက်တဲ့ ၄၉နှစ်မြောက်မွေးနေ့မှာ မတရားဖမ်းဆီးခံနေရမှုမှ အမြန်ဆုံးပြန်လည်လွတ်မြောက်ပြီး ဦးဇာဂနာမြတ်နိုးတဲ့ အနုပညာကို သက်ဆုံးတိုင် လွတ်လပ်ပျော်ရွှင်စွာ ပြုလုပ်နိုင်ပါစေကြောင်း ဆုမွန်ကောင်းတောင်းလိုက်ပါတယ်။

******************************

2 comments:

သက်ဝေ said...

သတိတရရှိတဲ့ ညီမကို ကျေးဇူးတင်လိုက်တာ...း))
အမလဲ သတိရနေတာ...
ညီမနဲ့ အတူတူ ဆုတောင်းပေးနေပါတယ်...

:P said...

ကိုဇာဂနာအတွက် ထပ်တူဆုတောင်းလိုက်ပါတယ်